«Үүн-чэлгий» кинигэ сүрэхтэннэ

Алтынньы ый 7 күнүгэр А.С.Иванов аатынан “Илкит” этнокультурнай кииҥҥэ «Өлөөн эбэҥки национальнай оройуон» культураҕа салаата Арассыыйаҕа норуоттар култуураларын үйэлээх баайын, Саха АССР төрүттэммитэ 100, Саха республикатыгар Ийэ, Өлөөн оройуонугар Аҕа сылларыгар, Оройуоннааҕы култуура дьиэтин үҥкүү-ырыа коллективын төрүттэммитэ 50-сыллаах үбүлүөйүгэр аналлаах “Өрүүтүн үүн, чэлгий Өлөөнүм” ырыа куттаах мелодистарын хомуурунньугун сүрэхтэниитэ буолан ааста.
Бу кинигэ ааптара Саха Республикатын култууратын туйгуна, Өлөөн кийиитэ Валентина Алексеевна Боекова. Валентина Алексеевна бэйэтэ 1976 сыллаахха Өлөөҥҥө үктэниэҕиттэн харыс да халбарыйбакка манна дьиэ-уот тэринэн, күн бүгүнүгэр диэри үлэлии-хамсыы сылдьар. Бу кинигэҕэ хас биирдии ырыа айааччы ырыатын нотаҕа суруйтарыы манан дьыала буолбатах, үлэттэн-сыраттан тахсар, ырыа сүппэккэ, уостан-уоска, кэнчээри ыччакка, үйэттэн-үйэҕэ норуокка ылланыа диэн, Ытык Өлөөн туһунан айыллыбыт ырыалары барытын киллэрэн, олох муудараһын мунньуммут, өй-санаа муҥутуур күүһүн туһанан бу хомуурунньук күн сирин көрдө. Бу иккис ырыа хомуурунньуга, бастакы хомуурунньук 1995 сыллаахха Александра Павловна Николаева таһаарбыта, ол кэннэ 27 сыл буолан баран 21 мелодист 174 ырыата нотаҕа тиһиллэн хомуурунньук буолан таҕыста.

Бу дьоро киэһэни Саха республикатын култууратын туйгуна, муниципальнай сулууспа бэтэрээнэ Наталья Денисовна Семенова салайан ыытта, хомуурунньукка киирбит ырыалары мелодист – автор Прокопий Павлов, Алексей Николаев, Влад Семенов, Татьяна Миронова, Дария Васильева, Семен Семенов, Аксинья Иванова, Вера Иванова, Вера Ларионова дуэттара көрөөччү биһирэбилин ылыан ыллылар. Николай Винокуров суруйбут, Николай Оленев матыыптаабыт Ээйик гимнэ “Ээйигим төрөөбүт мин дойдум” Ээйик диаспората толордо, ээйиктэр түмсүүлээхтэрин, ырыаһыттарын сөхтүбүт. Онтон “Кэрэ дьикти кыраайым” Надежда Докалова суруйан хаалларбыт ырыатын “Илкит” култуурнай киин уолаттара, “Үргэл” ансаамбыл саҥа састааба өрө көтөҕүллээхтик ыллаатылар. Уопсайынан хас биирдии ырыа ис хоһоонунан экраҥҥа видеороликтар таҥыллан оҥоһуллан аныгы олох сайдыы сиэринэн көрдөрүлүннэ.

Валентина Алексеевна биһиги өлөөннөр ырыаларбытын киэҥ эйгэҕэ таһааран бар дьонуҥ убаастабылын, улахан сыанабылын, махталларын ситистиҥ. Бу ырыанньык ырыа куттаах ырыаһыттарга, эдэр ыччакка, үөрэтээччилэргэ көмө буолуо диэн эрэнэбит.

Эһиги үлэҕэ сыһыаҥҥыт, олоххо баай көрүүгүт, үөрүйэххит, санааҕыт күүһэ мэлдьи биһиэхэ холобур буолар.

Ульяна Никифорова

 

Дата обновления страницы: 12.10.2022

Февраль 2023
Пн Вт Ср Чт Пт Сб Вс
 12345
6789101112
13141516171819
20212223242526
2728