https://www.instagram.com/p/CZG0wydN5xn/?utm_source=ig_web_copy_link
Саҥа 2022 сылы арыйыы аһыллыыта.
Убаастабыллаах “Сардаҥа” хаһыат актыыбынай, сэргээн ааҕааччылара эһигини үүммүт Баабыр сылынан – саҥа 2022 сылынан ис сүрэхтэн эҕэрдэлиибит! Баҕарабыт Саҥа дьылтан саҥа олох саҕахтара арылыннын, саҥа сылга үлэ-хамнас аартыктара аһылыннын! Бу үүммүт саҥа 2022 сыл Саха сиригэр сүҥкэн суолталаах, өрө көтөҕүллүүллээх, үөрүүлээх сылынан буолла. Муус устар 27 күнүгэр САХА АССР төрүттэммитэ 100 сыла. Саха Автономията, оччотооҕу Саха уобалаһа өрөспүүбүлүкэ быһыытынан статустаммыта бүгүҥҥү күҥҥэ хас биирдиибитигэр сүҥкэн улахан суолталаах. Арассыыйа Бэдэрээссийэтин Аҕа баһылыга Владимир Путин 2022 сылы Арассыыйа норуоттарын култуурунай нэһилиэстибэлэрин сылынан туһааннаах Ыйаахха илии баттамыта. Хас биирдии эрэгийиэҥҥэ искусствота, үгэстэрэ ураты уонна араас, ону хас биирдии киһи харыстабыллаахтык уонна болҕомтолоохтук сыһыаннаһарын эрэйэр. Хас биирдии эрэгийиэн бэйэтин ураты үгэстэрин илдьэ хаалара суолталаах. Материальнайа суох нэһилиэстибэ — бу остуоруйалар, сиэр-майгы, уус- уран айымньылар, норуот ырыалара уонна үҥкүүлэрэ. Холобур, сахаларга оһуохай — тыһыынчанан сыл анараа өттүгэр үөскээбит күн үҥкүүтэ — ытык үҥкүү. Ил Дархан Айсен Николаев быйылгы 2022 сылы Саха Өрөспүүбүлүкэтигэр Ийэ сылынан биллэрбитэ. Ийэ сылыгар кэрэ аҥаардар, ийэлэр дьарыктаах, үлэлээх буолууларыгар дьарыктаах буолуу кииннэригэр, бастатан туран, ханна олороллоруттан, саастарыттан, социальнай балаһыанньаларыттан тутулуга суох, кэрэ аҥаардар чөл туруктаах буолууларыгар анал бырагыраама үлэлиэҕэ, – диэн Ил Дархан иһитиннэриитэ, бу бырагыраамма олоххо киирииттэ Саха сирин ийэлэригэр дьиэ кэргэн өйөбүлүгэр сүҥкэн суолталаах буолла. Ил Дархан 2022 үбүлүөйдээх сылга төрөөбүт оҕолорго “Дети столетия” диэн соруктаах, 100 тыһыынча солкуобайдаах хапытаалы аныырга этии киллэрдэ, бу сылга саҥа төрөөбүт хас биирдии кырачааҥҥа 100 тыһынча солкуобай көрүллэн эдэр дьиэ кэргэттэргэ оҕо иитиитигэр улахан өйөбүл буолуо. Бу үүммүт саҥа 2022 сыл Саха АССР төрүттэммитэ 100 сылыгар, Арассыыйа норуоттарын култуурунай нэһилиэстибэлэрин, Саха Өрөспүүбүлүкэтигэр Ийэ сылынан арыллыытын оройуоннааҕы култуура салаата нэһилиэнньэҕэ өрө көтөҕүллүүлээхтик тэрийэн арыйда. Ол курдук А.С. Иванов аатынан “Илкит» этнокультурнай киин үлэһиттэрэ көс олохтоох хотугу норуот олохторун – дьаһахтарын көрдөрөр дьүһүйүүнү бэрт дьоҥҥо тиийимтиэ гына толорон көрдөрүүттэн саҕаланна. Бу дьоро киэһэни буоларын курдук чуор куоластарынан бэрт хомоҕойдук күндү көрөөччүлэрин биир тыыҥҥа сомоҕолоон иилээн – саҕалаан ыыттылар Татьяна Готовцева, эдэр ыытааччы Вячеслав Сидоров. Аспыт сыл үтүө түмүктэрин бар дьоҥҥо ситэрэн – хоторон билиһиннэрдэ Суглан оройуоннааҕы депутаттар сэбиэттэрин үөрэҕирии, доруобуйа, култуура кэмитиэтин бэрэссэдээтэлэ Мария Христофоровна Иванова. Өлөөн эбэнки националнай оройуонугар саҥа сылы Саха АССР төрүттэммитэ 100 сылыгар, Арассыыйа норуоттарын култуурунай нэһилиэстибэлэрин, Саха Өрөспүүбүлүкэтигэр Ийэ сылын арыллыытын тэрээһинин Муниципальнай оройуон Өлөөн эбэнки национальнай оройуон Баһылыга Елена Иванова үөрүүлээх быһыыга эҕэрдэлээн, баҕа санаатын туһаайан арыйда уонна өрө күүрүүлээх этиилэринэн быйылгы сыл бэлиэтин дьоро түһүлгэҕэ ыҥырыллыбыт туһааннаах хаһаайыннарыгар оройуоннааҕы култуура салаатын салайааччытыгар Надежда Николаеваҕа уонна элбэх оҕолоох ийэҕэ Альбина Николаеваҕа туттарда. Бу саҥа үүммүт 2022 сылга Саха АССР төрүттэммитэ 100 сылын уонна судаарыстыбаннай, политическай деятель Максим Кирович Аммосов төрөөбүтэ 125 сылын туолар ураты бэлиэ түгэннэри бэлиэтиэхпит. Бу улахан суолталаах кэми биһиги үлэбит — хамнаспыт сыыйа оннугар түһэн, олохпут-дьаһахпыт сааһыланан, өй-санаа, духуобунас өттүнэн өрө көтөҕүллэн, дойдубут инники сайдыытын туһугар бары бииргэ сомоҕолоһон көрсүөхпүт. Муус устар 27 күнэ 1922 сыл Саха АССР төрүттэммит күнэ. Саха АССР төрүттэммитэ 100 сылынан бу дьоро түһүлгэҕэ ыҥырылыннылар кини үбүлүөйдээх саастыылаахтара 1942 сыллаахха төрөөбүт начальнай кылаас учуутала, пенсионерка Киреева Клавдия Григорьевна, 1952 с. Павлова Ибарурра Кононовна пенсионерка, 1962 с. Константинова Надежда Семеновна Х.Николаев аатынан орто оскуолаҕа физкультура учуутала, 1972 с. Өлөөннөөҕү баһаарнай чааһын байыаһа Тимофеев Александр Иосифович, 1992 с. Ефимов Юрий Семенович муниципальнай оройуон администрациятын уопсай отделын специалиһа, 2002 с. Петров Виталий Борисович Дьокуускайдааҕы сибээс колледжын студена, 2012 сыллаахха төрөөбүт 4 кылаас үөрэнээччитэ Миша Никифоров. Бу дьоро киэһэҕэ эдэр ыччат аатыттан эҕэрдэ тылын тиэртэ Юрий Ефимов. Бу үөрүүлээх тэрээһин иккис түһүмэҕинэн лотерея оонньонно.Бу дьоро киэһэни кэрэ куоластарынан киэргэттилэр көлүөнэни ситимниир, ийэ ууһун тэнитэр Анна, Татьяна, Валентина Готовцевтар, Елена, Кэрэчээнэ Федоровалар, дьоһун – мааны дьиэ кэргэн Мария, Яков Егоровтар, эдэр ыал аҕата Юра Ефимов, эдэр талаан Владимир Бенчик, түмүккэ чаҕылхай ырыаһыт Тимур Корякин бар дьонун күн үҥкүүтүгэр ыҥыран оһуохайынан түмүктээтэ. Убастабыллаах Өлөөн олохтоохторо, төрөөбүт Өлөөҥҥүт чэчирии, барҕара сайдарын туһугар Алгыстаах айар аартыккыт аһыллан, айыҥ, тутуҥ, үлэни, үөрэҕи баһылааҥ! Бу үүммүт 2022 сылга баҕарабыт баҕа санааларгыт барыта туолуохтун, Өрүүтүн эһигинниин Махтал, Таптал, Эрэл эрэ эҥэрдэстин! Чөл, чэгиэн-чэбдик туруктаныҥ, этэҥҥэ буолуҥ!
Суруйда Валентина Боекова култуура салаатын ИМЦ методиһа
07.01.2022
