Дьоллоох Дьокуускай куорат килбэйэр киинигэр, А.Е.Кулаковскай аатынан доҕордоһуу киинигэр, «Аборигенка» түмсүү 30 сыллаах үбүлүөйүгэр аналлаах, «Симэх» галерея көҕүлээһининэн иис-уус алыбын иҥэриммит дьоммут «ӨБҮГЭ ИИҺИН ХАРЫСТААЧЧЫЛАР» быыстапкалара бэс ыйын 12-21 күнүгэр дылы дьон дьүүлүгэр туруорулунна. Бу республика үрдүнэн араас оройуонтан араас ис хоһоонноох оҥоһуктар турдулар. Биһиги оройуоммутуттан Надежда Колодезникова паннота, Мария Егорова саҥыйахтара, Мария Агаева аныгылыы сирийэн тикпин сонноро, Ия Сергеева сарыы дьахтар соно уонна саамай улахан оҥоһукпут И.В.Сталиҥҥа 1949 сыллаахха Дьэлиҥдэ нэһилиэгин Далбар Хотуна Прасковья Николаевна Николаева тикпит эр киһи комплект таҥаһын нэһилиэкпит талааннаах иистэнньэҥнэрэ сөргүтэн тигэн быыстапкаҕа кэрэ көстүү буолан турда, дьон болҕомтотун тарта. Быыстапка арыллыытыгар И.В.Сталин таҥаһын презентацията буолла. Бу улахан историческай үлэни Евдокия Николаева-Дьэлиҥдэ, Татьяна Семенова-Кирбэй, Ия Сергеева -Өлөөн, Матрена Николаева-Солоҕоон дууһаларын, сатабылларын ууран туран тигэн дьон дьүүлүгэр таһаардылар. Өбүгэ таҥаһын үйэтитээччи, сөргүтээччи, тилиннэрээччи Эһиги, илиигитигэр талааннаах дьоммут буолаҕыт. Иис-уус алыбын иҥэриммит, тарбахтарыгар талааннаах мааны дьоммут эдэрдии эрчимҥитин ыһыктымаҥ! Дьон-сэргэ ортотугар, үлэ үөһүгэр сылдьыҥ, үлэни өрө тутуҥ, саҥаны айыҥ-тутуҥ, саҥа сүүрээннэри олоххо киллэриҥ. Айар-тутар дьоҕургут сылаас санаанан тэтимирдин, саҥалыы көрүүлээх элбэх ыра санаа олоххо киирдин. Эдэр талааннаах ыччаттарга үтүө сүбэһит буолуҥ, кэлэр көлүөнэ өбүгэ ииһин салгыы турдун!
