Кулун тутар ый 31 күнэ 2025 сыл үс үллэр үөстээх Өлөөн Эбэ дьоллоох туонатын Айыы санаалаах, амарах дууһалаах,Өлөөн оройуонун культура үлэһиттэрэ дьоҥҥо-сэргэҕэ үйэлэрин тухары сырдык тыыны, үтүө санааны иҥэриигэ үлэлээбит бэтэрээннэрин уонна бүгүҥҥү күҥҥэ норуот духуобунай, материальнай культураларын сайыннарыыга, үйэтитиигэ айа-тута сылдьар үлэһиттэрбит «Сырдык айар кут – 2025» күрэх буолан ааста. Дьүүллүүр Сүбэ бэрэссэдээтэлэ – Надежда Николаева – Российскай Федерация норуотун үөрэҕириитин туйгуна, Саха республикатын культуратын үтүөлээх үлэһитэ, «Өлөөн эбэҥки национальнай оройуон» Культураҕа салалтатын начальнига; Дьүүллүүр Сүбэ чилиэннэрэ Николай Саввинов – 70-сыллардааҕы Өлөөн оройуонун норуотун айымньытын кыттыылааҕа, сцена ветерана, «Орончикан» эбэҥки национальнай ансамбль солисткаларын Марианна, Любовь аҕалаатар аҕалара; Александра Николаева — Саха Республикатын культуратын үтүөлээх үлэһитэ, Өлөөн оройуонун культуратын ветерана; Светлана Дмитриева – Дьэлиҥдэтээҕи “Аарык” култуурнай киин директора; Саха Республикатын культуратын туйгуна. Василиса Михайлова – Александр Иванов аатынан «Илкит» Этнокультурнай Киин уус-уран салайааччыта, «Сырдык айар кут» оройуоннааҕы культура үлэһиттэрин кыайыылааҕа
«Сырдык айар кут» күрэх кыттыылаахтара:
— Бастакы нүөмэрдээх кыттааччы — «Аарык» Дьэлиҥдэтээҕи Этнокультурнай Киин уус-уран салайааччыта Сандаара Протопопова;
— Иккис нүөмэрдээх кыттааччы – Галина Николаева аатынан «Илкээнньи» Кирбэйдээҕи Этнокультурнай Киин уус-уран салайааччыта Михаил Карпов;
— Үһүс нүөмэрдээх кыттааччы – Александр Иванов аатынан «Илкит» Этнокультурнай Киин директора Юрий Ефимов;
— Төрдүс нүөмэрдээх кыттааччы – «Сандал» Ээйиктээҕи Этнокультурнай Киин директора Людмила Заболоцкая;
— Бэһис нүөмэрдээх кыттааччы – Тамара Данилкина аатынан Оҕо ускуустубатын оскуолатын уһуйааччыта Айла Бенчик;
— Алтыс нүөмэрдээх кыттааччы Кииннэммит библиотечнай ситим үлэһитэ Юрий Юшкевич;
Дьоро киэһэни арыйар «Култуура үлэһиттэрин эҕэрдэлэрэ уонна Өбүгэ таҥаһын көрдөрүү» түһүмэҕиттэн саҕаланна, II түһүмэх «Бэйэни билиһиннэрии», III түһүмэх «Билбэт тексты ааҕыы», IV түһүмэх «Оҕолору, ыччаттары уонна дьону түмүүгэ саҥа технологиялары көрдөөһүн», V түһүмэҕэ “Талаан”, VI түһүмэх “ Култуура историятын кэрэһиттэрэ”, VII түһүмэх “Киэһээҥҥи кэрэ мааны таҥаһы көрдөрүү”.
Эдэр оҕолорбут бары өттүнэн дэгиттэр талааннаахтарын көрөн, билсэн көрөөччүлэр биһирэбиллэрин ылыан ыллылар. Ордук биллибэт сорудахха хоһоон уустаан-ураннаан көрөөччүгэ тиийэр гына аахтылар уонна история кэрэһитэ диэҥҥэ урут үлэлээн ааспыт дьоммутун үйэтинэн, кэпсээн, ахтан аастылар. Бары наһаа үчүгэйдэр, креативнайдар, толлон турбаттар, саҥаран-иҥэрэн аныгы олох ирдэбилин баһылаабыт эдэр ыччаттар дьон биһирэбилин ылыан ыллылар. Кыайыылааҕынан икки Юрийдар – Юрий Ефимов, Юрий Юшкевич очколара тэҥнэһэн буоллулар.
“Сырдык айар кут” күрэх – норуоту салайар күүстээх, эрэнэр, итэҕэйэр уонна ис кута-сүрэ барыта Кэрэ эйгэни тарҕатааччылар биһиги култуура үлэһиттэрэ буолабыт. Төрөөбүт дойдубут дьонун болҕомтотун тардан, өй-санаа өттүнэн байан, кэҥээн, дириҥээн, уос номоҕор, кэрэ кэпсээҥҥэ Өлөөн аатын аатырдарга, суон сураҕырдарга үлэ араас салааларын баһылаан, дойдубут социальнай-экономическай сайдыытыгар инники улахан хардыыны оҥоруохпут диэн бигэтик эрэнэбит.
Күрэхпитин иилээн –саҕалаан ыыттылар “Орончикан” Заслуженнай үҥкүү ансамблын выпускниктара Уруйдана, Алексей Николаевтар, сценарийы суруйда күрэх ааптара, Саха республикатын култууратын үтүөлээх үлэһитэ Надежда Николаева, уотунан-күөһүнэн киэргэттэ Александр Иванов, мусууканы таҥан оҥордо Алгыс Семенов, күүс –көмө буоллулар култуура тэрилтэлэрин бары үлэһиттэрэ.
Түбүктээх үлэбит туһалаах, көдьүүстээх буолуохтун, илиибит тиийбитэ илгэлээх буоллун, туппуппут тупса турдун, ылсыбыппыт ыпсан истин! Дьоллоох, доруобай буолуҥ!
