Сэтинньи ый 26 күнүгэр Өлөөн оройуонугар ветеринарнай сулууспа үлэһиттэрин үөрүүлээх түгэнэ – Кэм капсулатын ууруу сиэрэ-туома буолла. Бу кэлэр көлүөнэ ветеринардарга уонна тыа хаһаайыстыбатын үлэһиттэригэр анаммыт ураты сурук, кини биһиги баҕа санааларбытын, сулууспабыт остуоруйатын уонна оройуоммут бэлиэлэрин харыстыаҕа. Кэм капсулата эрэллээхтик уурулунна! Кини ветеринарнай сулууспа тэриллибитэ 100 сылын туолуутугар – улуу үбүлүөй күнүгэр – арыллыаҕа.
Ветеринарнай сулууспа үлэтэ тыа хаһаайыстыбатын тутаах хайысхатынан буолар. Эһиги сүөһү доруобуйатын көрүүннэн эрэ муҥурдаммакка, киһи-аймах бүтүннүүтүн доруобуйатыгар ахсаабат көмөнү оҥорон, туруулаһан үлэлиигит. Маннык улахан эппиэтинэстээх соругу толорууга улуус ветеринарнай сулууспатын үлэһиттэрэ тиһигин быспакка бэлэмнэнэн, эбии үөрэнэн, идэлэрин билиилэрин хаҥатан, кэми кытта тэбис тэҥҥэ хардыылыыллар. Айылҕа оҕолорун доруобуйалара этэҥҥэ буоларын туһугар үгүс үлэни ыыталлар. Эмчитэ суох табылыллыбаппытын курдук, бэтэринээрэ суох табыллыбаппыт. Улууспут бэтэринээрдэрэ бары үлэһиттэрэ идэлэригэр бэриниилээх, сыралаах үлэлэрэ, айылҕаны, кыыллары-көтөрдөрү харыстааһыҥҥа, чэбдигирдиигэ ыытар.
Улуус олоҕор биир эрэллээх, кыахтаах, кыанар тэрилтэ буоларыгар бары ытык бэтэрээннэргэ, үлэһиттэргэ дириҥ махталбын тиэрдэбин. Үйэ тухары үлэттэн илиигитин араарбаккаҕыт, ыарахантан толлубаккаҕыт, сымсах, чэпчэки үлэни сырсыбаккаҕыт, идэҕитигэр толору бэриниилээх үлэни баҕарабыт. Биир сомоҕо күүс буоламмыт биир дойдулаахтарбыт өбүгэ саҕаттан илдьэ кэлбит баайбытын табаларбытын, сылгыбытын ыарыыларга ылларбакка, энчирэппэккэ ветеринарнай сулууспа Өлөөн эбэҥки национальнай оройуонун үрдүк аатын бөҕөргөтө, үйэтитэ туруоҕа диэн эрэнэбит!
Эһиэхэ чэгиэн доруобуйаны, этэҥҥэ буолууну, барытыгар табыллыыны уонна дьолу-соргуну баҕарабыт.
