Бу дьыл, ахсынньы 18 күнүгэр Өлөөн эбэҥки национальнай оройуон Культураҕа салалтатын салайааччыта, Саха республикатын култууратын үтүөлээх үлэһитэ, Российскай Федерация норуотун үөрэҕириитин туйгуна Өлөөн оройуонун култууратын үрдүк таһымҥа таһаарбыт, өр сылларга сыралаһан үлэлээбит салайааччы, талааннаах дьиэ кэргэн истиҥ Ийэтэ, элэккэй Эбээ, элбэх оҕону үҥкүү алыбар үөрэппит, учууталлар учууталлара Надежда Прокопьевна Николаева айар аартык тоҕойдорун арыйбыта 60 сыллаах үбүлүөйүн үөрүүлээхтик бэлиэтээтибит!
Олох дьылҕатыгар аналлаах, үтүө үлэһит, сырдыгынан сыдьаайар салайааччы, ыраас суолу тэлэн, элбэх оҕону, ыччаты үҥкүү эйгэтигэр уһуйан, алыбын иҥэрэн, Өлөөн эбэҥки национальнай оройуон култууратын, үҥкүүтүн үйэтитээри кинилэр сүрэхтэригэр тапталы уонна кэрэҕэ тардыһыы кистэлэҥин иҥэрбитэ. Ол курдук үөрэппит араас кэмнээҕи выпускниктар эдэр саастарын санаан, ахтылҕаннарын таһааран үҥкүүлээтилэр, ыллаатылар-туойдулар, махтал тылларын анаатылар. Хас биирдии толорооччу тус-туспа ис хоһоонноох үҥкүүлэри үҥкүүлээн эдэр эрдэҕинээҕи сыллары санаттылар, урукку кэми видеонан көрдөрөн көрөөччүнү сөхтөрдүлэр. Бу киэһэ бары талаан чыпчаалларын, дууһалыын долгутуулаах ырыалары, ис сүрэхтэн толоруллубут үҥкүүлэри астыннылар.
Айар талаан диэн биир киһи баайа буолбатах – кини бүтүн норуот, бүтүн дойду киэн туттуута буолар. Сүгүрүйэбит талааннаах салайааччыга, учууталга Надежда Прокопьевнаҕа!
Бу айар киэһэҕэ икки сүүс киһи кытанна, бу буолар салаайааччы, учуутал дьоло – оҕолор эрэллээхтэрэ, махталлаахтара!
