Сааһы уруйдуу, Норуот маастарын күнүгэр аналлаах кулун тутар 3 күнүгэр “Илкит” этнокултуурнай киин сиэри – туому ыытар саалатыгар Саха Республикатын култууратын үтүөлээх үлэһитэ, Өлөөн эбэҥки национальнай оройуон норуодунай маастара Галина Христофоровна Долгунова уонна «Ай-тал-тик» айар түмсүү кыттыылаахтарын үлэлэрин быыстапката аһылынна.
Тэрээһин сыала: Айар үлэлэрин киэҥ эйгэҕэ билиһиннэрии, өбүгэ ииһигэр тапталы үөскэтии, дьон-сэргэ култуураны өйүүрүн көҕүлээһин.
Дьоро киэһэбит арыллыытын “Няруткан” түмсүү үҥкүүһүттэрэ үҥкүүлээн сэлэлии туран бу киэһэбит Далбар Хотуттарын ытыс тыаһынан уруйдаан-айхаллаан көрүстүбүт. Быыстапкабытын үөрүүлээх быһыыга-майгыга Култуура салаатын салайааччыта Надежда Николаева, уран тарбахтаах Галина Долгунова, «Ай-тал-тик» түмсүү салайааччыта Галина Габышева бу кэрэ үлэлэри көрдөрөр суолбутун арыйаран, кыһыл лиэнтэни быһан быыстапка аанын арыйдылар. Ол кэннэ ыраастаныы, алгыс сиэрин-туомун Күн Нуурал Хотун толордо, “Ай-тал-тик” түмсүү кыргыттара кэлбит ыалдьыттары айах тутан ньымаатынан күндүлээтилэр. Ол кэннэ быыстапкабытын култуура салаатын салайааччыта, Саха республикатын култууратын үтүөлээх үлэһитэ Надежда Николаева эҕэрдэтинэн саҕаланна, кэрэ куоластарынан эдэр ыччаттарбыт Ярослав Герасимов уонна Рустам Павлов эҕэрдэ ырыаларынан дьон сүргэтин көтөхтүлэр.
Бу быыстапкаҕа уран тарбахтаахтар араас хайысхалаах үлэлэри туруордулар. Билиҥҥи кэм иистэнньэҥнэрэ күндү тааһынан илиилэрин сылааһын иҥэрэн, тутан-хабан, чочуйан, тигэн таһаарбыт оҥоһуктара ураты кэрэ көстүүлэрин, сөҕө-махтайа көрдүбүт. Хас биирдии үлэ, хас биирдии оҥоһук – киһи дууһатын, санаатын, олоҕун, айылҕатын кэпсиир.
Күүстээх санааны, дьулууру инникигэ эрэли, саҥаны көрдөөн булан, айар үлэҕитин байытан иһэргитигэр баҕарабыт! Саҥаны билэргэ, саҕалыыргар, сайыннарарга күүскүт тиийиэхтин!
Дьоҕур быстыбакка көлүөнэттэн көлүөнэҕэ салҕана турдун!
