“Оһуорунан дьүһүйүү” кумалаан тигиитин күрэҕэ

Арассыыйаҕа Уһуйааччы уонна Аҕа сүбэһит, Өрөспүүбүлэкэҕэ Үлэ, улууска Эбэҥки тылын сылларыгар аналлаах Өлөөн оройуонун Аҕыйах ахсааннаах төрүт эбэҥки норуотун чаҕылкай Далбар Хотуна, эбэҥки таҥаһын тигэн киэҥ эйгэҕэ таһаарбыт, СР норуотун маастара Далбар Хотуна, РФ Худуоһунньуктарын Союһун чилиэнэ Христина Афанасьевна Бенчик өрөгөйдөөх үбүлүөйдээх 95 сааһын туолар сылыгар Култуура оройуоннааҕы салаата “Оһуорунан дьүһүйүү” диэн ааттаах таба тыһыттан Кумалаан тигиитин күрэҕин тэрийэн ыыттылар. Бастакы күнүгэр уран тарбах, мындыр өй, өбүгэ иис-уус алыбын үйэлэргэ тэнитэн, уһуйуллан таҥаһы таҥастыыр Өлөөн Далбар Хотуттара – 5 хамаанда буолан, А.С.Иванов аатынан “Илкит” этнокултуурунай киин саалатыгар иистэнэр-малларын салларын, матырыйаалларын туппутунан кэлэн , күнүс оруобуна 11 чаас саҕаланыыта, кытыан отунан сыт таһааран, торҕо буруону унаарытан үрдүк айыылартан көҥүл ылбыт кэннэ күрэх арыллар. Россияҕа наставник, уһуйааччы сыла ыытылларынан тэрийээччилэр наставник иистэнньэҥ уонна саҥа саҕалааччы иистэнньэҥнэри кытыннардылар, уопсайа 5 хамаанда, ол иһигэр ыраах Дьэлиҥдэ нэһилиэгиттэн 1 хамаанда, наставник Данилова Маргарита Сергеевна, эдэр иистэнньэҥ Мария Павлова, Дьокуускай куораттан 1 хамаанда уопуттаах иистэнньэҥ Игнатьева Марианна Егоровна, кини үөрэнээччитэ тирии таҥаһы тигиигэ аан бастакынан сүрэхтэммит Евдокия Семенова аныгы сайдыылаах үйэ сибээһин куйаар ситимин нөҥүө кытыннылар. Кирбэй нэһилиэгин хамаандата 1980 сылларга Христина Бенчик тэрийбит тирии таҥаһы тигэр сыаҕыгар иистэнэн саҕалаабыт, билигин ааттаах-суоллаах иистэнньэҥ, элбэх быыстапка кыттыылааҕа, Мария Ивановна Егорова, үөрэнээччитэ тирии, тыс диэни аан бастаан илиитигэр тутан иистэнэн эрэр эдэр иистэнньэц Софья Томская, сарыыттан, тирииттэн, тыстан олох эдэр сааһыттан иистэнэр, Христина Афанасьевна таһаарбыт кинигэлэриттэн ааҕан, көрөн үөрэммитим диир, Өлөөн нэһилиэгин маастара, эдэр да буоллар бэлиэр наставник Ия Сергеева уерэнээччитинээн Гульнара Евсеевалыын уонна 5-с хамаанда эмиэ Өлөөн нэһилиэгиттэн Христина Афанасьевна Бенчик талаанын илдьэ сылдьар сиэн балтыта Людмила Владимировна Бенчик кыыһынаан Айла Бенчиктыын кытыннылар. Балаһыанньа быһыытынан Кумалаан кээмэйэ 40 см. буолуохтаах, оһуора-мандара, быһата манна иистэнньэҥ бэйэтин бэлиэ буочара кини фантазиятыттан, айар талааныттан тутулуктаах. Бэлэм оҥоһук тигиитин хаачыстыбата, иистэнньэҥ сиигэ, биэтэһин ситэрэн оҥоруу, тас көрүҥэ, ким үлэтин эрдэ түмүктээбитэ барыта ирдэнэр. Кумалаан тигиитин күрэҕэ күнүс 11 чаастан саҕаланан баран эбиэттэн киэьэ түмүктэннэ.“Оһуорунан дьүһүйүү” күрэх кылаан кыайыылааҕынан ааттанар Дьэлиҥдэ нэһилиэгиттэн кыттар наставник Данилова Маргарита Сергеевна, эдэр иистэнньэҥ Мария Павлова хамаандата уонна бары түөрт кыттыбыт хамаандалар лауреат, дипломант ааты сүгэннэр Христина Афанасьевна Бенчик аймахтара — Бенчик Наталья Владимировна, сиэнэ Кристина Сергеевна Аманова, Колесов Александр Прокопьевич, Бенчик Людмила Владимировна, Гоголева Аида Никитична, Гоголева Наталья Прокопьевна, Виктория, Ян Гоголевтар дьиэ кэргэттэрэ, Оконешникова Лена Петровна, “Өлөөн” МУП директор Анатолий Прокопьевич Егоров туруорбут бириистэринэн наҕараадаланнылар.