Ыам ыйын 6-15 күнүгэр дылы Олоҥхо дойдутуттан төрүттээх Далбар Хотун, саха тылын уонна литературатын учуутала, учууталлар учууталлара, РСФСР үөрэҕиритин туйгуна, “Азия оҕолоро” фонда стипендиата Мария Николаевна Акимова сырдык кэриэһигэр XI оройуоннааҕы “Акимовскай ааҕыылар” хомоҕой хоһоон ааҕыытын күрэҕэ куйаар ситиминэн буолан ааста.
Мария Николаевна – ийэ, эбээ, учуутал, наставник быһыытынан киһи дууһатын уйаҕас кылларын таарыйан, дьон сүрэҕин нарынтан нарын, намчыттан намчы иэйиилэрин этэр дьиҥ чахчы киһиэхэ ылыннарар убаастанар учуутал этэ. Кини оҕо сүрэҕин хомойууттан харыһыйар, үөрэнээчччилэрин санаа өттүнэн өрүһүйэр сымнаҕас тыл, истиҥ киһилии сыһыаны олохтуура. Учуутал, кылаас салайааччыта, завуч, организатор эбээһинэстэрин толороро. Өлөөн ыччата чэчирии сайдарыгар, үөрэхтээх буоларыгар өйүнэн-санаатынан, ис сүрэҕиттэн, дууһатыттан артыыс бэрдэ, айар үлэһит имэннээҕэ, устар ууну сомоҕолуур уус тыллаах буолан “Орончикан” Арассыыйа норуодунай ансамблын киэн аартыкка таһаарсыбыта. Дириҥ билии, үрдүк култуура, сиэрдээх иитии, оҕолорго биир кэрэ сыһыана барыта улахан оруоллаах. Кини сүрэҕэ кэлэр үйэлэри сырдатар аналлааҕа.
Бу дьоро ахтыы киэһэ Мария Николаевна үөрэнээччилэрэ Татьяна Константинова, Люда Заболоцкая, Лия Боекова суолдьут, ыытааччы, дорҕоонноохтук хоһоону ааҕыыга уһуйбут учууталы, уһуйааччыны ахтан –санаан аастылар, оҕо эрдэҕинээҕи хоһооннорун дорҕоонноохтук аахтылар.
Куйаар ситимин нөҥүө уопсайа 88 хоһоону таптааччылар, сэҥээрээчилэр кытыннылар. Саамай кырдьаҕас кыттааччыбыт, тыыл бэтэрээнэ, Саха республикатын норуотун маастаара, Кирбэй нэһилиэгин ытык кырдьаҕаһа Анна Федоровна Сергеева хоһоонун наһаа үчүгэйдик өйтөн аахта. Онтон кини уола Семен Семенович бэйэтэ суруйбут хоһоонун аахта. Күрэхпит түөрт группаҕа оҕолорго 7 -17 сааһыгар, эдэр ыччат 18-35 сааһыгар, 36 сааһыттан үөһээ саастаахтарга уонна группанан ааҕыыга арааран дьүүллүүр сүбэ үлэлээтэ. Дьүүллүүр сүбэ салайан үлэлэттэ Мария Николаевна Акимова кыра кыыһа Ия Федорова, Николай Семенов – спорт бэтээрэнэ, Эльвира Яковлева –оройуон дьаһалтатын экономика отделын салайааччыта, Екатерина Николаева- кииннэммит библиотека директора уонна Ульяна Никифорова култуура салаатын үлэһитэ.
7-17 саастаах оҕолорго Хатас орто оскуолатын 5 кылаас үөрэнээччитэ кыайыылааҕынан таҕыста, Сандаара Степанова — Өлөөн орто оскуолатын үөрэнээччитэ, Эрсан Оленев –Ээйик орто оскуолатын үөрэнэччитэ, Алина Андреева Өлөөн орто оскуолатын 7 кылааһын үөрэнээччитэ.
18-35 саастарыгар дылы эдэр ыччаттарга Уйгу Семенов Дьэлиҥдэ нэһилиэгэ, Михаил Карпов Кирбэй нэһилиэгэ, Андрей Васильев Шологон нэһилиэгэ.
36 үөһээ саастаахтарга Федора Семенова Дьэлиҥдэ орто оскуолатын учуутала, Анна Федоровна Сергеева, Алла Тарасовна Петрова, Семен Семенович Николаев, Дмитрий Борисович Федотов.
Бөлөҕүнэн ааҕыы күрэҕэр Өлөөн орто оскуолатын 8 кылаас үөрэнээччилэрэ, 11 кылаас үөрэнээччилэрэ, 5 кылаас үөрэнээччилэрэ, Дьэлиҥдэ орто оскуолатын 3 кылаас үөрэнээччилэрэ, 1 кылаас үөрэнээччилэрэ.
Бу кэннэ Мария Николаевна аатынан Дьиэ кэргэнинэн успуорт көрүҥнэригэр түргэн дуобат, хаамыска, хабылык, дартс көрүҥнэргэ күөн көрүстүлэр. Манна саамай Ытык кырдьаҕас тыыл бэтэрээнэ, дуобат, саахымат оонньууларын баһылаабыт Николай Иванович Николаев, бэтэрээн — табаһыт Владимир Игнатьевич Романов бэйэлэринэн кэлэн өй оонньуутугар оҕолорго холобур буоллулар.
Кыттааччылар, кыайыылаахтар мэтээллэринэн, туоһу суруктарынан, сыаналаах бирииһинэн наҕараадаланнылар.
Үүнүү-сайдыы аартыга арыллан, дойдубут чэчирии сайыннын. Айыыһыттарбыт араҥаччылыы сырыттыннар, Иэйиэхситтэрбит арчылаан, тускуну туһаайдыннар. Бары харысхаллаах буолуоҕуҥ, Дьоллоох олох тосхойдун!
Бары этэҥҥэ эрэ буолуоҕуҥ. Сырдык санаанан салайтарыаҕыҥ, сарсыҥҥы күҥҥэ эрэл, олоххо дьулуур аргыстастын!
