2022 сыл ыам ыйын 6 күнүгэр Ытык Өлөөн киинигэр А.С. Иванов аатынан «Илкит» Этнокультурнай Киин уораҕайыгар «Акимовскай ааҕыылар» VIII оройуоннааҕы хомоҕой хоһоон түһүлгэтигэр Олоҥхо дойдутуттан төрүттээх Далбар Хотун, Саккырыыр, Өлөөн, Дьокуускай Орто оскуолаларыгар өр сылларга үлэлээбит, саха тылын уонна литературатын учуутала, «Орончикан» эбэҥки национальнай ансамбылын төрүттэспит, эбэҥки хоһооннорун-ырыаларын, фольклорун хомуйбут, түмпүт, эбэҥки культуратын пропагандалааһыҥҥа олоҕун анаабыт, РСФСР норуотун үөрэҕириитин туйгуна, «Учууталлар учууталлара», «Азия оҕолоро» фонда стипендиата Мария Николаевна сырдык аатыгар, 88 сааһыгар анаммыт харах уулаах, үөрүү үктэллээх Улуу Кыайыыны уһансыбыт ытык дьоммутугар сүгүрүйэн туран VIII оройуоннааҕы «Акимовскай ааҕыылар» хоһоон ааҕааччылар күрэхтэрэ сэрииттэн эргиллибэтэхтэргэ уонна эргиллибиттэргэ сүһүөхтээх бэйэбит сүгүрүйэн туран, хомоҕой тыллаах хоһоон Ытык түһүлгэтин тэрийэн ыыттыбыт.
Быйылгы күрэххэ Дьүүллүүр Тойон Сүбэҕэ үлэлээтилэр: Эльвира Яковлева Саха республикатын культуратын туйгуна, Клавдия Григорьевна Киреева – учуутал, Күн Күбэй ийэ, эйэҕэс эбээ, Михаил Никифоров – «Сайдам ыал» оройуоннааҕы дьиэ кэргэн күрэҕин кыайыылаах дьиэ кэргэн Аҕа баhылыга, аламаҕай эhээ, Светлана Дмитриева — «Сардаҥа» хаһыат үлэһитэ, Күн Күбэй ийэ, эйэҕэс эбээ, Тимур Корякин — III оройуоннааҕы «Акимовскай ааҕыы» күрэҕин «Кылаан кыайыылааҕа», ырыаhыт, автор – толорооччу.
Сут – кураан сылларга хоргуйан, эрэйи-муҥу көрөн, тыылга Кыайыыны уһансыбыт дьоммутун ахтар, саныыр Ытык иэспит — диэн туран күрэхпитин саҕалаабыт 7-17 сааcтарыгар диэри категорияҕа 10 конкурсант кыттыыны ылбытыттан кыайыылаахтарынан таҕыстылар:
«Хомоҕой хоһоон түһүлгэтигэр сүрэхтэнии» номинация — Х.М.Николаев аатынан Өлөөн Орто оскуолатын оскуолатын 6 «А» кылааһын үөрэнээччилэрэ.
«Бастакы хоһоон түһүлгэтигэр холонуу» номинация — Өлөөн орто оскуолатын 2 «В» кылааһын үөрэнээччилэрэ.
«Кыайыыга дьулуурун иһин» номинация — Өлөөн орто оскуолатын 6 “В” кылааһын үөрэнээччитэ Саша Миронов.
«Дипломант III үрдэлэ» — Дьэлиҥдэ Орто оскуолатын 3 кылааһын үөрэнээччилэрэ.
«Дипломант II үрдэлэ» — Өлөөн орто оскуолатын 6 “В” кылааһын үөрэнээччитэ Анжелика Слепцова.
«Дипломант I үрдэлэ» — Өлөөн орто оскуолатын 4 “А” кылааһын үөрэнээччилэрэ.
«Лауреат III үрдэлэ» — Ээйик орто оскуолатын 4 кылааһын үөрэнээччилэрэ.
«Лауреат II үрдэлэ» — Ээйик орто оскуолатын 5 кылааһын үөрэнээччитэ Мотя Боекова.
«Лауреат I үрдэлэ» — Өлөөн орто оскуолатын 4 “А” кылааһын үөрэнээччитэ Ангелина Дмитриева.
«Кылаан Кыайыылаах» үрдүк аат иҥэрилиннэ буруо, туман, хараҥа, тымныы, күүрүү, туос аччык, хаһыы-ыһыы, ыар ынчык, харах уулаах уот сэриини хоһуйбут Өлөөн орто оскуолатын 7 “Б” кылааһын үөрэнээччитэ Ирина Синицына («Ленские столбы», кылаас салайааччыта Айталина Камерова).
«Акимовскай ааҕыылар» VIII оройуоннааҕы күрэххэ 18 үөһээ саастаахтарга Дьүүллүүр Сүбэ маннык түмүгү таһаарда:
«Хомоҕой хоһооннору айыы иһин» номинация — Роза Павлова (Өлөөн).
«Үрдүк таһымнаах толоруу иһин» номинация — Уйгу Семенов (Москва куорат)
«Дипломант III үрдэлэ» — Зорина Филиппова (Дьэлиҥдэ).
«Дипломант II үрдэлэ» — Насима Рахимова (Ээйик).
«Дипломант I үрдэлэ» — Елизавета Иванова (Ээйик).
«Лауреат III үрдэлэ» — Варвара Степанова (Ээйик)
«Лауреат II үрдэлэ» — Полина Степанова (Ээйик)
«Лауреат I үрдэлэ» — Анна Стручкова (Өлөөн)
«Кылаан Кыайыылаах» үрдүк аат иҥэрилиннэ Мария Васильевна Семеноваҕа.
Түгэнинэн туһанан, хоһоон биһигэ буолбут күрэх ыытыллыытыгар бары кыттыбыт, тэрийбит, бу хомуһуннаах хоһоон киэһэтэ ыытылларыгар дууһаларын ууран күүс-көмө буолбут үтүө-мааны дьоммутугар, ыччаттарбытыгар, Дьүүллүүр Тойон Сүбэҕэ, күрэҕи ыытыыга спонсордаабыт Мария Николаевна Акимова сиэнигэр Айсена Николаеваҕа истиҥ махталбытын тиэрдэбин уонна үтүөкэн тыл аргыстаах, ичигэс иэйии доҕордоох сайаҕас санаа доҕуһуоллаах истиҥ илдьит арыаллаах чаҕылхай Кыайыы күнүнэн эйэҕэс дьоммор – Эһиэхэ эҕэрдэ бастыҥын аныыбын.
Өлөөн Эбэ кэрэ туонатыгар Олоҥхо дойдутун Далбар Хотуна, Өлөөн Орто оскуолатыгар өр сылларга үлэлээбит, саха тылын уонна литературатын учуутала, РСФСР норуотун үөрэҕириитин туйгуна, «Учууталлар учууталлара», «Азия оҕолоро» фонда стипендиата Мария Николаевна Акимова аатынан VIII оройуоннааҕы хоһоон ааҕааччылар күөн күрэстэрин кыттыылаахтарыгар, төрөппүттэригэр, кыайыылаахтарыгар баҕарабын тапталлаах Өлөөммүт албан аатын, Аҕа ууһун суон сураҕырдыҥ, аар сааргы аатырдыҥ!
Күүрүүлээх айар үлэни өрө тутан, сайдыылаах үйэ дьоһун дьоно буола улаата сайдыҥ! — диэн эрэнэн, итэҕэйэн туран алгыырбын көҥүллээҥ!
Махталы, ытыктабылы, үтүө санааны кытта
М.Н. Акимова улахан кыыһа Надежда Николаева
