Бу дьыл, атырдьах ыйын 15 күнүгэр Өлөөн дойдутун кэрэ миэстэтэ, Ытык сирбит “Дагаман Бугала” этнокомплекс аһыллыытын көмүс түгэнэ буолан ааста. Хоту дойду байҕалын кэриэтэ, баай-талым киэҥ нэлэмэн сирдэрдээх, дьэҥкир ыраас, чэгиэн-чэбдик салгыннаах, очуос таас хайалардаах, айылгылаах-айылҕалаах, дьүкээбил суһумнуур суолунан, күлүмүрдүүр сулустардыын алтыһар, ыйдаҥа уотунан сырдатар, ый хаамыытынан сирдэтэр, тоҥ хаары тобулан, силлиэ-буурҕа быыһынан айаныыр Үрэн Хоһуун дойдутун Саарыннара, эдэр эрчимнээх ыччаттара, уолан уолаттара күүс ылар, арчыланар Ытык сирбит силигин ситэн олоххо киирдэ. Бу Эр Хоһууттарбыт куттара-сүрдэрэ бөҕөргүүрүгэр, өй-санаа сааһыланалларыгар, сэниэ –күүс киллэринэр, ыраастанар, көрүүлэнэр Ытык сир буолар, Саргылаах Өлөөммүт бөҕө туруктаах буоларыгар уонна сайдарыгар Үрдүк Айыыларбыт көрө-истэ сылдьан, көмүскэл хахха буоланнар арчылыы турдуннар. Бу улахан үлэни бэйэбит уолбут, оҕобут Владислав Семенов иилээн-саҕалаан, сүүрэн-көтөн күрбэ таастары көрдөөн, булан, аҕалан туруоран дьон махталын ылла. Саҥа тутууну көрөн дьон сэргэ астынна, хайҕаата. Кэрэ айыл5абытыгар сылдьан, төрөөбүт дойдубут тылынан сатаан этиллибэт сүдү күүһүн, киһиэхэ биэрэр ыраас модун тыынын өйдүөхтээхпит, иҥэриниэхтээхпит. Бу улахан оҥоһугу “харыстабыллаахтык” ыраастык тутуохтаахпыт.
Бу этнокомплекс аһыллыытыгар тоҕус сир тааһа, тоҕус Аҕа уустар сыдьааннара, тэрилтэнэн биһиги күүстээх аҥардарбыт, дурдаларбыт — хаххаларбыт мунньустан айылҕабытыгар сиэр-туом ыытылынна, күүс-уох ыллылар. Алгыс күүһүн түһэрэн, дьонун арчылаата айылҕаттан талааннаах уолбут, Саха республикатын култууратын туйгуна Кирилл Игнатьев, “Сэвэкмо” — сүгүрүйэр ытык бэлиэбитин оҥорон туруорда Кирбэй нэһилиэгин олохтооҕо, Өлөөн оройуонун норуодунай маастара Александр Андреев.
Сиэр-туом ыытыллыытыгар кыттыыны ыллылар Тоҕус Аҕа уус сыдьааннара Чордулар, Онтойдор, Николаевтар, Семеновтар, Бенчиктар, Гладкиннар, Солоҕооннор, Боескоровтар, Сээркээннэр уонна бааһаарынай сулууспа байыастара салааччы Руслан Винокуров, сирдьиттэринэн, баһылыктарынан буоллулар: Михаил Христофоров, Владимир Христофоров, Христофор Семенов, Игорь Боескоров, Николай Саввинов, Мирослав Иванов, Иван Филиппов, Иван Атаков, Вадим Николаев. Иилээн саҕалаан, түсчүттээлэр Александр Васильев уонна эдэр эрчимнээх ыччат Егор Николаев.
Аар Айыылар аартыктара арылыннын, олорор олохпут сырдыгынан сыдьаайдын, күн күүһэ сэниэ-күүс биэрдин! Дойдум дьоно сүргэҕитин көтөҕө сылдьыҥ, кыраттан санааҕыт самныбатын. Күһүҥҥү күммүтүн айхаллаан саргылаах олохпут үүнэн — сайдан истин! Айыыһыккыт арыаллаатын, Иэйиэхсиккит эҥэрдэстин, күн күүһэ көмүскэлинэн үтүө буолуоҕуҥ!
